يقول صاحب الرساله

عايز ابسطها
بعد ماكانت نفسيتها متدمره بسبب مرض امها .
و بالتالي اهديتها الامبالا الرياضيه اللي طارت من الفرحه لما اخدتها . و طبعا نزلت صور كتير و شكرتني كتير .بعد يومين بالظبط من عيد الميلاد لقيت ابني بيكلمني و كان في منتهي الڠضب و الحده و هو بيسألني ازاي اعمل كده و ازاي ادي الامبالا لبنت مراتي !
استغربت من سؤاله و استغربت اكتر من الحده و الڠضب اللي كان بيتكلم بيهم . ردا علي الاسلوب رديت باسلوب اعنف اني حر اعمل اللي انا عايزه !
قالي لا ما انتاش حر ! انت وعدتني العربيه دي تكون من نصيبي لو اتفوقت و اتخرجت من الجامعه !
قلت له ما حصلش قالي لا حصل و اني وعدته بده !
قلت له انا راجل ابن و رجعت في كلامي و اللي عندك اعمله و اخرك هاته !
قالي انه عارف اني مش كذاب فقط اب سئ نسي انه ليه ابن فضلا عن نسيانه لوعده بالعربيه و بالورشه في يوم ما …وقفل في وشي السكه !
كنت ڠضبان جدا من اسلوبه و مراتي جت علي صوتي العالي تسألني في ايه . حكيت لها طلبت مني اهدي و افكر اذا كنت وعدته العربيه فعلا لان وقتها هيكون من حقه يغضب . و قالت لي علي رغم فرحه بنتها بالعربيه الا انها ممكن ترجعها و تاخد اي عربيه تانيه من العربيات اللي اشتغلت عليهم !
في فوره الڠضب قلت لها لا و حتي لو وعدته العربيه دي مش هياخدها برضه و انا حر !
مراتي طلبت مني اهدي لان اي كلام دلوقتي يكون مؤذي . فا الافضل اني اهدي و احاول افتكر و اراجع نفسي . و سابتني !
بعد المكالمه دي بحوالي 4 ايام طليقتي كلمتني و هي علي اخرها و صوتها كان واصلني من غير التليفون ! بتقولي اني اب سئ و اني كسرت قلب ابنها ! و اني ما اكتفيتش اني اهديت العربيه اللي وعدته بيها لبيت مراتي بل و كمان ما حضرتش حفل تخرجه من الجامعه !
قلت لها اني ما اعرفش انه هيتخرج اصلا ما قاليش قالت لي انها بنفسها بعتت لي قبل الحفله بشهر و بعتت مرتين بعدها تأكد عليا في رسايل و انها هي اللي بعتت لي لانها طلبت من الولد يركز في الحفله و هي هترتب انها تبلغني لدرجه انها بعتت لي تبلغني انها و جوزها هيستضيفوني في بيتهم يومين تلاته لان الولايه بعيده .
و هي علي التليفون فتحت الرسايل لقيت منها عدد رسايل فعلا بنفس المعلومات اللي بتقول عليها . كنت بقرأ الرسايل و انا ساكت و هي عماله تزعق لغايه ما وصلت للينك الكتروني لحفل
تخرج الجامعه و
عرفت في اللحظه دي ان ابني درس الهندسه قسم ميكانيكا !
الحفل كان بعد مكالمه ابني بيومين ! يعني بالنسبه له انا اهديت عربيته لبنت مراتي و ما حضرتش حفل تخرجه في نفس الاسبوع !طليقتي انهت المكالمه بانها تفضل اني ما اكلمش الولد تاني ! و انا وقتها حسيت احساس سئ جدا . انا فعلا اب سئ زي ما هو قال ! انا اتسحلت في حياتي لدرجه اني ما عرفتش ابني درس ايه !
درس الحاجه اللي هتخليه يشتغل معايا زي ما وعدته و نسيت !
حاولت اكلمه و اتواصل معاه اكتشفت انه عمل لي بلوك من كل حته ! مراتي قررت تتواصل معاه و تعتذر له و تبلغه ان بنتها رجعت العربيه و انها من حقه . اعتذر لها و قال اه ما بقاش عايزها و انها كانت وعد مني و انه لما اتضايق ما اتضايقش عشان بنتها اتضايق اني ما وفيتش بوعدي .
و انه بيحترمها و بيحبها هي و بنتها بس هو بعد المكالمه دي هيعمل لها بلوك لانه مش عايز اي تواصل معايا !
كنت بسمع المكالمه لان مراتي كانت بتكلمه قدامي و انا مستنيها تخلص عشان اخد السماعه اكلمه . وقتها هو اعتذر لها مره تانيه و انهي المكالمه !
و عمل لها بلوك !
الموقف ده مر عليه سنتين ما بطلتش احاول اتواصل معاه . اخر مره كان عن طريق طليقتي وقتها هو رفع البلوك و بعت لي رساله بيقولي فيها اني نسيت ان عندي ابن و هو بس بيعاملني بنفس المعامله و نسي ان ليه اب !
و عمل بلوك تاني !